Едейская сельская библиотека - филиал №1

Күндү ааҕааччылар! Нэһилиэк библиотекатыгар, саҥа кинигэлэр кэлбиттэрин  билиһиннэрэбит.

Аҕыйах хонугунан Саҥа дьылбытын көрсүөхпүт, онон уһун өрөбүллэргэ дьиэҕитигэр олорон олус интэриэһинэй кинигэлэрдэ уларсан ааҕарга тиэтэйиҥ. 

Егоров Иван Иннокентьевич. Ийэ сүрэҕэ / Иван Егоров-Сүгэһэрдээх. — Дьокуускай : Айар, 2024. — 96 с.

Сэрии толоонугар охтубут биэс ини-бии Малгиннар күн күбэй ийэлэрэ Ф.Н. Малгина-Хобороос барахсан буойун уолаттарыныын инники кэккэҕэ мэлдьитин бииргэ баара, кинилэр ыарахан түгэннэригэр иһирэх тылынан, сүрэҕин сылааһынан көмө-тирэх буолара. Олох уонна сэрии… Бу модун уонна уодаһыннаах мөккүөрдэр Хобороос сүрэҕин ортотунан ааһаллара, ыар аһыытын барытын күүстээх санаатынан уйан, кыайыыны көрсөн, саҥа дьиэтигэр сиэннэринэн дьоллонор.

Ааптар маны сэргэ «Дьүөгэлиилэр» диэн аныгы олох көстүүтүн көрдөрөр оонньууга хайалара сатабыллаах саһыл саҕалаах буоларын таайтарардыы табатык ойуулуур.

Саллаат аҕата. Валерий Попов, Иван Александров.- Дьокуускай: СМИК-Мастер. Полиграфия, 2024.-192.

Попов Валерий Николаевич сэһэниттэн Иван Александров суруйуута. Бу кинигэҕэ СВО-ҕа кинини кытары  бииргэ сэриилэһэ сылдьар араас омук дьоно, сэргэстэһэ чаастарга сылдьар  саха сирин уолаттара кэпсэнэллэр.

Олор  эрэ буолуо дуо Донескай, Луганскай, Харьковскай хайысханнан сылдьар хорсун саха сэрииһиттэрэ сэһэҥҥэ киирдилэр.

Нельбисова Галина Васильевна. Чып кистэлэҥинэн… : сэһэн / Г. В. Нельбисова. — Дьокуускай : Айар, 2024. — 288 с.

Төрүүр дьиэҕэ биир күн бэбээрэ түспүт уоллаах кыыстарын ийэлэрэ сылаас түөстэригэр ыга кууспуттара, биһиктэригэр нөрүйэн, оҕолорун инники дьылҕатын түстүүр, алгыыр тыллары аргыый сипсийбиттэрэ… Бу уоллаах кыыс сэрэйбэтэх сэрэбиэйдэрэ, түһээбэтэх төлкөлөрө хайдах салаллыаҕай? Чып кистэлэҥ арыллыа дуо… Ол барыта дьиэ кэргэҥҥэ сыһыан, сиэр-майгы, таптал, уйулҕа нарын кылларын таарыйан көрдөрүллэр.

Корякина Римма Иннокентьевна-Хотууна. Минньигэс түүл остуоруйалара / Римма Корякина-Хотууна ; Марфа Егорова ойуулара. — Дьокуускай : Айар, 2024. — 32 с. : ил.

Утуйуох иннинэ остуоруйалаһыы — үтүө үгэс уонна оҕо саас биир саамай истиҥ өйдөбүлэ. Күндү төрөппүттэр, эбэлэр, эһэлэр, бу аптаах кинигэҕэ оскуолаҕа киириэн иннинээҕи кыра саастаах уонна алын кылаас оҕолоругар аналлаах кыыллар, көтөрдөр, үтүө санаалаах дьон туһунан аныгы остуоруйалар киирдилэр. Хас биирдии остуоруйаҕа саха норуодунай бэйиэтэ Иван Мигалкин бэргэн этиитэ бэриллэр. Бу остуоруйалары эһиги сөбүлүөххүт диэн эрэнэбит.

Макеев Данил Николаевич. Оҕом аҕалаах буоллаҕына… : сэһэннэр / Данил Макеев ; Д. Н. Мухин уруһуйа. — Дьокуускай : Айар, 2024. — 160 с.

Дьылҕа ыар охсуутун тулуйар, кытаанах-тыйыс тургутуутун уйар, олоххо талаһар күүс туохханый? Бу ыйытыыга хоруйу талааннаах суруйааччы Данил Макеев саҥа кинигэтигэр киирбит «Оҕом аҕалаах буоллаҕына…», «Оҥоһуу» айымньыларыттан булуоҥ. Сэһэннэргэ сүрүн дьоруойдар — эдэр дьон Бааскалаах Ньургуйаана уонна аар кырдьаҕас Өлөксөй Баһылайабыс мөккүөрдээх, уустук, саха киһитэ санаан да көрбөтөх соһуччу түгэннэрдээх, ыар оҥоһуулаах дьылҕаларын суола ааҕааччыны толкуйдатар, уйадытар, үөрэтэр, сэрэтэр дириҥ ис хоһоонноохтук уус -ураннык ойууланар.

Кэлэн уларсан ааҕыҥ, сэргээҥ.

Саҥа дьылы — саҥа кинигэлэрдиин көрсөбүт!