Едейская сельская библиотека - филиал №1

Билиҥҥи кэмҥэ дьон — сэргэ, оҕолор дьоннорун, төрөппүттэрин үтүө ааттарын үйэтитэн араас кинигэлэри бэчээккэ бэлэмнээн таһаарар буоллулар. Бу олус кэрэхсэбиллээх үтүө дьыала.

Муус устар 10 күнүгэр Максим Дмитриевич Соловьев кинигэ сүрэхтэниитин  Уус-Алдантан, Мэҥэ Хаҥаластан, Дьокуускайтан, Намтан кэлбит күндү ыалдьыттара аан бастаан  З.П. Саввин аатынан Үөдэй орто оскуолатын “Ийэҕэ Албан Аат” түмэлигэр сылдьан Үөдэй нэһилиэгин историятын кэпсиир экспонаттары, стендэлэри кэрэхсии дуоһуйа астына көрдүлэр.

Ыалдьыттар Үөдэй  нэһилиэгин балаҕаныгар 2016 сыллаахха олохтоммут “Нэһилиэк киэн туттар дьоно” серия кинигэ 4-с таһаарыытыгар Максим Дмитриевич Соловьев олоҕун, айар үлэтин сырдатар, кэпсиир саҥа тахсыбыт кинигэ  сүрэхтэниитин үөрүүлээх чааһыгар сырыттылар.

Максим Дмитриевич сырдык аатыгар анаммыт, саҥа бэчээттэнэн тахсыбыт кинигэтин биһирэмэ үгүс киһини муста: бииргэ үөрэммит,  үлэлээбит алтыспыт доҕотторо, биир дойдулаахтара, чугас аймахтара.

Үөдэй нэһилиэгэ “Дойду дьонунан, сир аатынан сураҕырар” дииллэринии, саха дьоно-сэргэтэ баараҕай омук удьуора буолан дириҥ мутуктаах-силистээх Ийэ дойдуларыгар бэриниилээх, үтүө суобастаах, дьаныардаах дьоһун үлэһиттэринэн, талааннаах дьонунан биллэр. Биир оннук эриэккэс, үтүөкэн дьоһун киһинэн 18 сыл устата нэһилиэк исполкомун бэрэссэдээтэлинэн, баһылыгынан үлэлээн-олорон ааспыт   Саха Өрөспүүбүлүкэтин тыатын хаһаайыстыбатын туйгуна, Нам улууһун сайдыытыгар кылаатын иһин, Саха сирин тыатын хаһаайыстыбатын бэтэрээнэ  түөскэ кэтиллэр бэлиэлэринэн наҕараадаламмыт,  Нам улууһун уонна Үөдэй нэһилиэгин  бочуоттаах Ытык киһитэ Максим Дмитриевич Соловьев буолар. Кини өр сылларга салайар үлэҕэ нэһилиэгин, улууһун сайдыытын туһугар таһаарыылаахтык  үлэлээн кэлбит өлбөөдүйбэт өҥөлөөх. Киэҥ  көрүүлээх, дириҥ толкуйдаах, сырдык өйдөөх — санаалаах,  төрөөбүт дойдутун туһугар  олоҕун анаабыта.

Кинигэ “Үөдэй нэһилиэгин киэн туттар дьоно” серия иһинэн 150 ахсаанынан, 201 сирэйинэн быйыл “Алаас” кинигэ кыһатыгар бэчээттэнэн таҕыста. Кинигэни хомуйан оҥордулар Екатерина Григорьевна Соловьева-Григорьева, Мария Григорьевна Соловьева, Светлана Николаевна Делахова. Кинигэҕэ Максим Дмитриевич олоҕун үлэтин-хамнаһын туһунан чугас аймахтарын суруйуулара,  үөлээннээхтэрин истиҥ ахтыылара, ону тэҥэ тус архыыбыттан ылыллыбыт санааларын суруктара,  хаартыскалара  тиһиллэн киирдилэр.

Сүрэхтэнии дьоро күнүгэр  бэйэлэрин эҕэрдэ тылларын, санааларын үллэһиннилэр «Нам улууһа»  муниципальнай оройуон  баһылыгын солбуйааччыта Филипп Васильевич Николаев, «Үөдэй нэһилиэгэ»  тыа сирин түөлбэтин дьаһалтатын баһылыга Иван Васильевич Гаврильев, Ил Түмэн Государственнай мунньаҕын  тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ  Александр Павлович Атласов,  Саха Өрөспүүбүлүкэтин норуотун хаһаайыстыбатын үтүөлээх үлэһитэ, Нам улууһун ытык киһитэ Александр Николаевич Ядреев,  бииргэ үөрэммит оҕо сааһын  оҕолоро,  Омскай куоракка үөрэммит студент доҕотторо, өр кэмҥэ бииргэ алтыһан үлэлээбит коллегалара, аймахтара,  чугас дьоно. Кинигэ сүрэхтэниитин үөрүүлээх чааһа  истиҥ иһирэх быһыыга-майгыга ыытылынна.

Тыл эппит дьон Максим Дмитриевич  бастыҥ салайааччы быһыытынан үлэтин -хамнаһын сырдаттылар, ону таһынан кини ырыа куттаах салайааччы буоларын тоһоҕолоон бэлиэтээтилэр.

Бу маннык Үөдэйбит үтүөкэн үлэһит дьонун кэпсиир, сырдатар кинигэлэр тахсаллара кэнчээри ыччакка тиэрдиллэр үтүө дьыала холобурунан буолар.