Едейская сельская библиотека - филиал №1

Ыам ыйын 25 күнүгэр Сахабыт сиригэр  Оһуохай күнэ бэлиэтэнэр. Бырааһынньык 2023 сыллаахха Ил Дархан Айсен Николаев балаҕан ыйын 7 күнүнээҕи Ыйааҕынан ылыныллыбыта.

  Саха дьоно Оһуохай күнэ бэлиэтэнэр буолбутун өрө көтөҕүллэн үөрэн көрсүбүттэрэ. Оһуохай бу сахалар төрүт, өй-санаа бииргэ түмсэр үҥкүүтэ. Ил Дархан бу Ыйааҕын сүрүн соругунан  саха төрүт үҥкүүтүн  оһуохайын харыстааһын уонна киэҥ эйгэҕэ тарҕатыы буолар. 

   Оһуохай — сахалар былыргы үҥкүүлэрэ. Сиэри-туому тутуһууну кытта ситимнээх. Былыргы сахалар аан дойдуну көрүүлэрэ бу үҥкүү хамсаныыларын нөҥүө биллэр. Оһуохайдыырга элбэх киһи эргимтэҕэ туран анал хатыланар хамсаныылары оҥоро-оҥоро уонна биир киһи тылын үтүктэн ыллыы-ыллыы күн хоту эргийэллэр.

Оһуохай үс чаастан турар. Саҕалааһын – таһаарааччы дьону ыҥырар, бытаан үҥэр хамсаныылар оҥоһуллаллар. Иккис аҥара – хаамыы-үҥкүү – оһуохай саамай уһун чааһа. Манна сэниэлээх хамсаныылар баар буолаллар, дэгэрэҥ ырыа ылланар. Үҥкүүһүттэр илиилэрэ-атахтара имигэстик хамсыыр. Оһуохай үһүс чааһа – көтүү. Бу үҥкүү чыпчаала. Саамай кылгас ол гынан баран саамай өрө көтөҕүллүүлээх түгэн. Дьон ойуоккалаан бараллар. Көтүү – үҥкүү  сүрүн санаатын ситиһэр – айыылары кытта биир буолууну, санаа бөҕөргөөһүнүн үөскэтэр.

   Оһуохай күнүнэн биир дойдулаахпыт Саха өрөспүүбүлүкэтин үтүөлээх оһуохай этээччитэ, Нам улууһун Дархан оһуохайдьыта Петр Егорович Федотов Улуу Кыайыы 80 сылыгар  анаабыт оһуохайын сэҥээрэ ааҕаргытыгар.

Улуу Кыайыы оһуохайа

Дьэ-буо оһуохайдыыр оһуохай,

Эһиэкэйдиир эһиэкэй.

Чэйиҥ эрэ доҕоттоор,

Улууканнаах Кыайыы

80-нус сыла туоларынан сэгэрдээр.

Илиилэртэн ылсыһан,

Эриэ дэхси үктэнэн,

Оһуохайдыыр оонньуунан

Уруйдуоҕуҥ доҕоттоор.

Ахтан-санаан ааһыаҕыҥ

Олорон ааспыт дьоннорбутун.

Эһэлэрбит барахсаттар

Түөлбэлэртэн ыҥырыллан,

Тэлгэһэлэриттэн тэлэһийэн,

Алаастарыттан арахсан,

Уоттаах сэриигэ

Айаннаары хомуллан,

Саха таптыыр үҥкүүтүн –

Оһуохайдыыр оонньууну

Ыллаан-туойан баартара.

Улууканнаах кыайыыга

Оһуохайдыыр ырыабыт туһаайбыта буолаарай?!

Кэрэлиирэ сэһэҥҥэ

Ыччат дьоҥҥо – биһиэхэ

Номох буолан хааллаҕа.

Уодаһыннаах өстөөхтүүн

Хаан харсан, хабырыйсан,

Уот будулҕан ортотунан,

Сибиниэс ардах аннынан

Сахам хорсун саллаата арҕаа барса турбута.

Оһуохайдыыр оһуохай,

Эһиэкэйдиир эһиэкэй.

Хара дьайдаах өстөөҕү

Арҕаҕыгар илдьэннэр,

Арҕастарын тоһуталаан

Уораҕайдарын үрдүгэр

Уоттаах кыһыл Знамябыт

Күлүбүрээн тахсыбыта.

Салют бөҕө ытыллан

Аан дойду үрдүнэн

«Ураа» – хаһыы дуорайан

Уодаһыннаах өстөөҕү

«Ээхтэрин» этитэн,

Эйэлээх олох суолун

Бигэтик туруорсан,

Сахам хорсун саллаата

Эргиллээхтээн кэлбитэ.

Унньуктаах сэриигэ

Арҕаа хаалбыт саллааттар

Эдэркээн куттара,

Хас сааһын аайытын

Оппут-маспыт ситиитэ,

Сибэккибит тыллыыта

Өндөл мэҥэ халлааҥҥа,

Үрүҥ күммүт аннынан

Үөр туруйа буоланнар

Туруктаһан кэлэллэр.

Чэйиҥ эрэ сэгэрдээр,

Сүһүөхтээх бэйэбит

Сүгүрүйэн туруоҕуҥ,

Тоностоох бэйэбит

Тоҥхойо көрсүөҕүҥ.

Уруйдуоҕун доҕоттоор,

Айхаллыаҕыҥ сэгэрдээр.

Оһуохайдыыр оһуохай,

Эһиэкэйдиир эһиэкэй.