Едейская сельская библиотека - филиал №1

Үөдэй нэһилиэгэр алтынньы 28 күнүгэр сонун, дириҥ ис хоһоонноох тэрээһин буолан ааста. Ол курдук хомоҕой тыллаах хоһооннору, кэпсээннэри  айбыт Сыккыс литературнай түмсүү салайааччыта Виталий Дмитриевич Яковлев оҕолоро, бииргэ төрөөбүттэрэ истиҥ иэйиилээх хоһооннорун, кэпсээннэрин суруйан хаалларбытын түмэн, «Күн көмүс күлүмүн күллэрэн» диэн кинигэ таҕыста.

Саҥа кинигэ сүрэхтэниитин үөрүүлээх чааһын  ытыс дохсун тыаһынан аалай кыһыл лиэнтэтин сүөрдүлэр Алексей Дмитриевич Яковлев, Софья Дмитриевна Кобякова, Ньургуяна Витальевна Яковлева.

Кинигэбит аата «Күн көмүс күлүмүн күллэрэн» диэн. Киһи сүргэтин көтөҕөр күһүҥҥү пейзажтар көстүүлэринэн киэргэммит. Кинигэбитин арыйан, киирии тыл көмөтүнэн кинигэ уратытын өйдөөн, налыччы ааҕабыт… айар-суруйар дьоҕурдаах киһи иһирэх иэйиилэринэн айылҕа араас көстүүлэрин, таайыллыбат таптал күүһүн, күннээҕи олох дьикти көстүүлэрин.

Виталий Дмитриевич «Кэрэтин эбитин”, “Дойдубут – Үөдэйбит барахсан” диэн хоһоонноро уостан түспэт ырыа буолан ылланаллар.

Нэһилиэкпитигэр өссө биир кэрэ ис хоһоонноох хомуурунньук күн сирин көрдө.

Кинигэ  тутулун, ис хоһоонун билиһиннэрдэ үгүс матырыйаалы хомуйан киэҥ билиигэ таһаарбыт РФ үтүөлээх учуутала, Ийэҕэ Албан аат музей салайааччыта Алексей Дмитриевич Яковлев.

Бу бэлиэ күнүнэн Виталий Дмитриевич  оҕолоро, бииргэ төрөөбүттэрэ, эн мин дэһэн улааппыт, бииргэ үөрэммит оҕолоро, чугас доҕотторо, бииргэ алтыспыт үөлээннэхтэрэ, олохтоох дьаһалта  эҕэрдэлэрин, истиҥ иһирэх тылларын тиэртилэр.

Виталий Дмитриевич оҕолоро, сиэннэрэ куйаар ситимин нөҥүө ыыппыт эҕэрдэлэрэ тэрээһини олус киэргэттэ.

Күндү ыҥырыылаах ыалдьыттары Виталий Дмитриевич кыргыттара минньигэс туордунан күндүлээтилэр.

Бү күн биһиги Үтүө, сэмэй да киһи кэлэн, олорон, айан-тутан барбытын өссө төгүл өйдөөн –санаан аастыбыт. Бииргэ алтыспыт доҕотторо Виталий Дмитриевиһы үлэһит быһыытынан ураты хаачыстыбаларын, киһи быһыытынан сылаас сыһыанын ахтан-санаан, астына кэпсээтилэр.

Дьэ бу курдук кинигэ сүрэхтэниитэ олус дьоһуннук, астыктык, умнуллубаттык ааста.