Едейская сельская библиотека - филиал №1

Олунньу 13 күнүгэр Төрөөбүт сахабыт тылын сайыннарыыга-чинчийиигэ олоҕун анаабыт, саха алфавитын төрүттээбит, бастакы лингвист Семен Андреевич Новгородов төрөөбүт күнэ, ону сэргэ төрөөбүт тыл, сурук-бичик күнүнэн бэлиэтэнэр. Онон салайтаран биһиги нэһилиэкпитигэр — Ийэ тыл, сурук-бичик күнүгэр аналлаах тэрээһиннэр буолан аастылар.

  Ол курдук Үөдэй оскуолатын интернатын иитиллээччилэригэр  “Ийэ тыл – этигэн күүһэ”  — диэн интеллектуальнай оонньуу  5 түһүмэхтээх  ыытылынна. Манна  кини кимий, өс хоһооннорун ситэрии, сомого домох, нууччалыыттан сахалыы тылбаас курдук  боппуруостарга эппиэттээн көхтөөхтүк кытыннылар.

  Маны таһынан үөрэнээччилэр сылын аайы ыытыллар “Сахалыы дьыктаан” өрөспүүбүлүкэтээҕи аахсыйаҕа  бөлөҕүнэн арахсан суруйдулар.

Олунньу 14 күнүгэр “Сарыал” сынньалан киинэ, Үөдэй орто сүһүөх оскуолата, олохтоох библиотека тэрийиилэринэн «Б.Ө.К» ( булугас өйдөөхтөр күрэхтэрэ) 5-10 кылаас оҕолоругар хатыһыылаах күрэх ыытылынна. Бастатан туран Мария Кельциева алгыс тылынан сиэр-туом толордо. Кини саха тыла кэхтибэтин, сайда турдун диэн баҕа санаатын эттэ. Онтон 8 түһүмэхтээх оонньуу ыытылынна оҕолор саха тылыгар аналлаах ыйытыктарга хоруйдаатылар, кроссворд таайдылар, көхтөөхтүк оонньоотулар.

  Олунньу 15 күнүгэр нэһилиэк олохтоохторо сылын аайы ыытыллар өрөспүүбүлүкэтээҕи «Сахалыы дьыктаан» аахсыйаҕа кыттан,  буойун суруйааччы Тимофей Сметанин «Кыайбыттар ыһыахтара» кэпсээниттэн быһа тардыыны суруйдулар. Хас биирдии кыттааччы махтал суругунан бэлиэтэннэ, кыайыылаахтар анал ааттарынан наҕараадаланыахтара.

Үөрэнээччилэр ортолоругар «Бастыҥ суруксут» — Рианна Захарова уонна «Үчүгэй суруксут» — Эльвира Мучиринова  буоллулар.

   Улахан дьоҥҥо «Бастыҥтан бастыҥ суруксут» Екатерина Алексеевна Эверстова, «Бастыҥ суруксут» — Юлия Юрьевна Черноградская, Чэмэлиинэ — Ньургуһун Ядреева  буоллулар.

  Кыайыылаахтары эҕэрдэлиибин, кыттыбыт дьоммор истиҥ махталбын тиэрдэбин.

Бу курдук сэргэхтик төрөөбүт тыл, сурук-бичик күнүн бэлиэтээтибит. Туругурдун төрөөбүт төрүт тылбыт!