Едейская сельская библиотека - филиал №1

Бастакы эфир өссө 1930 сыл сэтинньитигэр саҕаламмыта. Эфиргэ сахалыы уонна нууччалыы тыллар иһиллибиттэрэ: «Дьокуускай саҥарар. Говорит Якутск » — саха сирин биллэр-көстөр государственнай деятеллэрин кыттыылаах бастакы биэрии.

Өрөспүүбүлүкэ үгүс улуустарыгар Дьокуускайтан сигналы хабан, нэһилиэнньэҕэ араадьыйа долгуннарын тарҕатар араадьыйа узеллара баар буолбуттара. Саха сиригэр араадьыйаны тарҕатыы киэн дабааннаахтык ыытыллара.

Радио сайдыыта

• 1931 сыллаахха уһук көмүс хостуур оройуоннары киини кытта ситимниир Алдан радиостанция үлэтин саҕалаабыта.
• 1933 сылга республикаҕа хайыы-үйэ 15 радиоузел үлэлээбитэ, ол иһигэр Чурапчыга, Аммаҕа, Уус-Майаҕа уонна да атын нэһилиэнньэлээх пууннарга.
• 1933 с. «Кэнники сонуннар»диэн бастакы радиопрограмма эфиргэ таҕыста.
• Сыл буолан баран-саха сирин суруйааччыларын республикатааҕы бастакы конференциятыттан быһаччы трансляция, бу саха радиовещаниетын историятыгар саҥа түһүмэҕи бэлиэтээтэ.
• Аҕа дойду Улуу сэриитин тыҥааһыннаах иһитиннэриилэрэ, кыайыыга ыҥырыылара, бу барыта араадьыйа долгунунан аастаҕа.

Төһөлөөх элбэх киһи саҥатын иҥэтин, төһөлөөх элбэх сонуну, ырыаны-тойугу бар дьоҥҥо тириэртэҕэ.

Хас биирдии саха ыала сарсыарда ахсын араадьыйа сонунун, күн-дьыл туругун истэн эрэ баран хотонугар тахсара, үлэтигэр тиэтэйэрэ. Ыраах булчут үүтээнигэр, отчут отуутугар, табаһыт чуумугар эмиэ араадьыйа саҥата чугдаарара.

Билигин Саха сиригэр 30-тан тахса территориальнай араадьыйа долгуна баар, ол иһигэр «Саха араадьыйата» судаарыстыбаннай информационнай-музыкальнай станция. Кини билигин соҕотох Саха сирин бүтүннүүтүн хабар маассабай сонуну киэҥник тарҕатар ситим буолар.

Радио «Тэтим» — республика бүтүн сиригэр-уотугар үлэлиир радиостанция. Биэрии икки государственнай тылынан ыытыллар: нууччалыы уонна сахалыы, ону тэҥэ хотугу сир төрүт олохтоох аҕыйах ахсааннаах норуоттарын тылларынан — эбээннии, юкагирдыы.

Бүгүҥҥү күҥҥэ информационнай технологиялар түргэнник сайдаллар, ол да буоллар, иһитиннэриини тарҕатыы биир саамай түргэн уонна маассабай ньыматынан араадьыйа буолар. Саха араадьыйата өрөспүүбүлүкэ хас биирдии дьиэтигэр иһиллэ турдун.

Төлөпүөҥҥэ НВК «Саха», «Радио Тэтим» уонна «Тэтим подкаст» сыһыарыылар нөҥүө онлайн истиэххэ сөп. «ТЭТИМ-Саха араадьыйатын» FM 107.1 долгуҥҥа холбооҥ, истиҥ, сэҥээриҥ!