Едейская сельская библиотека - филиал №1

Саха сиригэр сааскы бастакы сибэкки Ньургуһун күнэ ыам ыйын 18 күнүгэр 2004 сылтан бэлиэтэнэр. Ньургуһун сааһы, кэрэни уонна сылааһы кэрэһэлиир. Ньургуһун — тымныыттан толлубат соҕотох сибэкки.

Ньургуһун кэрэтэ ырыаҕа ылламмыта, хоһооҥҥо хоһуллубута элбэх, ол курдук саха киһитин айар кутун кылын таарыйар ураты алыптаах.  Ньургуһуну ырыанан иэйии киһиэхэ уонна төрөөбүт дойдуга тапталга, тоҥ буору тобулан, хаары-мууһу быыһынан күн диэки тардыһар күүһү биэрэр.

Чэ, онон күндү ааҕааччы, ыллыах-туойуох, олоххо кэрэни,  нарын иэйиини эрэ түстүөх.

Ньургуһуннар. И. Дмитриев тылл., В Протодьяконов мелодията

Хара сир устун саас маҥнай

Хааман иhэр кэрэтиэн!

Сэрэммиттии оргууй аҕай

Сири көрөн иhэбин.

Халдьаайы ахсын тэтэрэннэр,

Ньургуhуннар үүммүттэр,

Таптал курдук нарын, сэмэй,

Тыыннаах буолар эбиттэр!

Номох буолбут сахам кыыhын —

Ньургуhуну санаатым,

Таптыыр кыыспар кини аатын

Иҥэриэхпин баҕардым.

Ньургуһунна бэлэхтээ.  П. Тобуруокап тылл., А. Алексеев мел.

Көтө-дайа кустуктана,

Көрө-истэ туллуктана

Хоспор куруук кииримэ,

Куппун-сүрбүн иирдимэ.

Ол эрэн эн сэрэнэҥҥин,

Оргууй аҕай үктэнэҥҥин,

Чуумпу хоспун сэгэтээр,

Ньургуһунна бэлэхтээр!

Көмүс куорсун кыталыктар

Көмүс сааспын илдьэ баартар,

Чаҕылыҥнас кырыалар

Чанчыктарбын саппыттар.

Ньургуһунум баҕар эмиэ

Дууһам уотун тилиннэриэ,

Умнубуту санатыа,

Уйадыта ыллатыа.

Ол эрэн эн сэрэнэҥҥин,

Оргууй аҕай .үктэнэҥҥин,

Чуумпу хоспун сэгэтээр,

Ньургуһунна бэлэхтээр!

Ньургуһун. Н.Артемьев тылл., Д.Санников мел.

Ыраас кырдал кытылыгар

Ыркый ойур саҕатыгар,

Чагда дьэҥкэ тыатыгар,

Хатыҥ чараҥ быыһыгар.

Ньургуйаана ньургуһун,

Тупсубутуҥ олуһун.

Сааһын куруук эн тахсан

Күнү көрсө күөгэйэҕин,

Ньургуһунум барахсан

Дойдум ньуурун симиигин.

Сиккиэр тыалтан наскыйан

Сэгэлдьийэ тураҕын

Үөрүүгүттэн долгуйан

Үҥкүүлүүргэ дылыгын

Сиэдэрэйкээн дьүһүнүҥ

Сүрэҕи сымнатар

Саҥа тыллар мөссүөнүҥ

Сахам кыыһын санатар.

Ньургуһун барахсан.   И. Артамонов тылл, И. Иванов мел

Эн биһи кыракый

Сааспытын санатан,

Кырдалга тахсыбыт

Ньургуһун барахсан.

Хос ырыата:

Тоҥ буору тобулан

Силиһи тардынар,

Күн диэки дьулуһан

Саас эрдэ көҕөрөр.

Тыллыбыт ньургуһун

Тырымныы хамсаата

Үчүгэй урсунан

Күн диэки хоҥкуйда.

Кыыс буолан харалдьык

Кырдалга наскыйда,

Уол буолан быһыйдык

Туос ууран кылыйда.

Ньургуhуннар.

Харалдьыкка сааһын

Аайыттан тыллар

Кэрэ нарын сибэкки

Ньургуһун ньургуһунуом

Сырдык күнүм

Ыраас чаҕылхай кыыма буолан

Ирбэт тоҥ буорга үүнэр

Дьикти сибэкки

Ньургуһуннар тыллаллар

Мин хонуубун толороллор

Ньургуһуннар ньургуһуннар сибэккилэр.

Сахам сирин Килбик

Киһитэ буолан үүнэр

Дьикти сибэкки

Ньургуһун ньургуһунуом

Итэҕэйэбин өрүү

Маннык буолуо диэн

Сиргэ таптал  дьол

Кэлиэ олохпутугар

Бастакы Ньургуһун. С.Данилов тылл., Г. Мамонтова мел.

Үчүгэй да буолар ньургуйан

Күн өҥнөөх бастакы Ньургуһун.

Ып-ыраас амарах хараҕынан

Эрэнэ көрүнэр тулатын.

Тугу да, тугу да билиммэт

Дьолтон, күн санааттан ураты.

Ол иһин тымныыттан сэрэммэт,

Ньургуннук тобулар тоҥ буору.

Бастакы барыта ураты

Үөрүүнү, иэйиини үөскэтэр:

Бастакы күөрэгэй ырыата,

Кэҕэ кыыл чоргуйар саҥата.

Ньургуһуннар. Баал Хабырыыс тылл., В. Андросов мел.

Халаан уутун сүүрүктэрэ

Халдьыгырыы уһуннулар.

Хойууккатын үүммүттэрэ

Халдьаайыга ньургуһуннар.

Сайылыгым кыргыттарын

Санаттылар ньургуһуннар.

Баанан кээстэр былааттарын,

Бөлөх-бөлөх муһуннулар.

Биһилэҕи кистэһэллэр,

Битийэн атах тэпсэллэр.

Оргууй аҕай кэпсэтэллэр,

Уолаттары кэтэһэллэр.

Кыыртан куотар кус буоланнар

Кылбарыһа сырсыахтара.

Баҕар, бырыычыкалааннар

Бары саһан хаалыахтара…

…Кэтэһимэҥ, ньургуһуннар,

Кэлбэттэр аны уолаттар.

Отучча кыс хаар уулунна,

Уолаттар аҕам дьон буолтар.

Уһугунна ньургуһун.  Н. Михалева тылл., Ст. Васильев мел.

Ыллыы илик ырыам дуу,

Ыраах-ыраах ырам дуу

Тыллан кэллэ сүрэхпэр,

Тырымнаата харахпар.

Уһугунна нарын иэйии,

Уһугунна үрүҥ айыы,

Уһугунна ньургуһун,

Уһугунна күөх урсун.

Таптал тылын таайтаран,

Санаа кыыма саҕыллан

Сардаҥарда сырдык мичээр,

Үөрдэ, күллэ тулам сэмээр.

Махтанабын кэрэ сааска,

Махтанабын эдэр сааска,

Ньургуһуннаах кырдалга,

Куруук үүнэр ырааска.