Едейская сельская библиотека - филиал №1

Тохсунньу 31 күнүгэр, Н.М. Рыкунов аатынан Намнааҕы кииннэммит библиотека конференс-саалатыгар,  Аан дойдуга саханы үтүөнэн ааттаппыт чаҕылхай тустуук Иннокентий Зырянов сырдык кэриэһигэр анаммыт “Суол хаалларбыт чаҕылхай тустуук»  кинигэ сүрэхтэниитэ буолан ааста.  

  Элбэх ахтыылардаах, чаҕылхай олоҕун бары кэрчиктэрин хабар сэттэ түһүмэхтээх, элбэх сэдэх хаартыскалардаах кинигэни бииргэ төрөөбүттэрэ түмэн “Дани-Алмас” кинигэ кыһатыгар 208  сирэйинэн, 90 ахсаанынан киэҥ эйгэҕэ таһаардылар.

  Кинигэни хомуйан оҥорбут СӨ үөрэҕириитин туйгуна,  Иннокентий бииргэ төрөөбүт эдьиийэ Татьяна Николаевна Зырянова истиҥ-иһирэх ахтыыны оҥордо. Бэлиэ түгэҥҥэ Татьяна Николаевна кэлбит ыалдьыттарга махтанан туран хас биирдиилэригэр кинигэни бэлэх туттарда.

  Кинигэ мытырыйаалын наардаан, сааһылаан. сүбэ-ама биэрбит РФ үтүөлээх учуутала,  З.П. Саввин аатынан Үөдэй орто оскуолатын “Ийэҕэ Албан аат” түмэл салайааччыта Алексей Дмитриевич Яковлев кинигэ ис тутулун билиһиннэрдэ.

  Норуоттар икки ардыларынааҕы спорт маастара, ССРС Сэбилэниилээх күүстэрин 3 төгүллээх чемпиона Иннокентий Николаевич сырдык аатыгар анаммыт, саҥа бэчээттэнэн тахсыбыт кинигэтин биһирэмэ үгүс киһини муста: бииргэ үөрэммит, спорт үрдүк чыпчаалларыгар бииргэ алтыспыт доҕотторо, биир дойдулаахтара, бииргэ төрөөбүттэрэ, чугас аймахтара, успуорт бэтэрээннэрэ,  Көрсүһүү хаһан баҕарар буоларыныы, истиҥ быһыыга-майгыга барда.

 Чурапчытааҕы сылларыттан Василий Николаевич Гоголев, Михаил Васильевич Ноговицын,  Егор Дмитриевич Аржаков, уо д.а. — Иннокентий Николаевич  доҕор, спортсмен быһыытынан майгытын, олоххо сыһыанын, көрүүлэрин туһунан дьоһун ахтыылары оҥордулар. Кинигэ тула бэйэлэрин санааларын үллэстиннилэр уонна ахтан санаан аастылар спорт үрдүк чыпчаалыгар тахсарыгар сүдү кылааты киллэрсибит Федот Архипович Соловьев, биир дойдулааҕа, үөлээннээҕэ  Александр Николаевич Ядреев. Кинилэр бары биир киһи курдук, Иннокентий Зырянов оҕо эрдэҕиттэн сүрдээх бэрээдэктээҕин, үтүө майгылааҕын, Улуу тириэньэр Дмитрий Петрович Коркиҥҥа уһуйуллубутун бигэргэттилэр. 

 Чөл олоҕу уонна спорду өрө тутар, үтүө дьыалалары уонна бастыҥнары үйэтитэр, кэскили түстүүр кинигэлэр үксүү элбии  турдуннар.