Едейская сельская библиотека - филиал №1

Николай Денисович Неустроев саха реалистическай литэрэтиирэтин төрүттээччилэртэн биирдэстэринэн буолар. 1895 с., ахсынньы 15 күнүгэр Байаҕантай улууһугар (билиҥҥитэ Таатта улууһа)  сэниэ бааһынай дьиэ кэргэҥҥэ төрөөбүтэ.

Уол аймахтарыгар Слепцовтарга олорон, Баайаҕа 4 группалаах оскуолатын үчүгэйдик үөрэнэн бүтэрбитэ.

Николай 15 сааһыгар, 1910 с. Дьокуускай куораттааҕы түөрт кылаастаах училищеҕа 3 сыл үөрэммитэ. 1912 с. үөрэнээччилэр нэдиэлэҕэ биирдэ таһаарар, илиинэн суруллар «Юность» сурунаалларыгар редактордаабыта.

Николай Денисович 1919 с. Байаҕантай волревкомун уонна төрөөбүт нэһилиэгин ревкомун чилиэнинэн улэлээбитэ, 1920 с. Байаҕантай улууһун комиссарынан анаммыта, улуус ревкомугар председателлээбитэ. 1922 — 1924 сс. Дьөҥкүүдэй (Уолба) сэттэ кылаастаах оскуолатыгар учууталлаабыта.  «Оскуолаҕа спектакыллары туруорууну салайарын таһынан «Ньургуһун» диэн ааттаах ыйга биирдэ тахсар сурунаал үлэтин салайара.  1925-1926сс. «Хозяйство Якутии» сурунаал редакциятын эппиэттиир секретарынан үлэлээбитэ.  1927с. республика эдэр суруйааччыны Николай Неустроевы Москваҕа В.Брюсов аатынан литературнай институтка үөрэххэ ыыппыта. Мантан кини ситэ үөрэммэккэ ыарыыта бэргээн төннөн кэлэргэ күһэллибитэ. Николай Денисович Неустроев 1929 с. ыалдьан күн сириттэн күрэммитэ.

Айымньылара:

«Дьиикэй олох» диэн бастакы кэпсээнин нууччалыы суруйан 1917 сыллаахха соҕуруу «Сибирские записки» сурунаалга бэчээттэппитэ.

1916 сыллаахха Былатыан Ойуунускайы кытта Н.В. Гоголь «Ревизорун» сахалыы тылынан саҥардыбыта.

1920 сыллаахха аатырбыт «Кукаакы Кулуба» комедиятын суруйан аата-суола норуокка киэҥник биллибитэ, саха литературатыгар чаҕылхайдык киирбитэ. “Куһаҕан тыын”, “Тиэтэйбит” о.д.а. аатырбыт комедияларын суруйталаабыта. Прозаик быһыытынан “Балыксыт”, “Ыйдаҥа”, “Сэмэнчик” о.д.а. кэпсээннэри айан хаалларбыта.

Николай Неустроев кинигэлэрин библиотекаттан уларсан ааҕыҥ, сэргээҥ.